ಕರುನಾಡ ಜಿಲ್ಲೆಗಳ ಕಿರು ಪರಿಚಯ - 3 - ಯಾದಗಿರಿ

Spread the love

ಕಲಾವತಿ ಪ್ರಕಾಶ್
ಬೆಂಗಳೂರು

ಬೆಟ್ಟದ ಮೇಲೆ ಕೋಟೆ ಕಟ್ಟಿ
ಆಳ್ವಿಕೆ ನಡೆಸಿದ ಚಾಲುಕ್ಯರು
ಕೋಟೆಯನ್ನು ಬಲಪಡಿಸಿದಂಥ
ಹೆಮ್ಮೆಯ ರಾಜರು ಯಾದವರು

ಬೆಟ್ಟ ಎಂದರೆ ಗಿರಿಯೆಂದರ್ಥ
ಆಳ್ವಿಕೆ ಮಾಡಿದರು ಯಾದವರು
ಗಿರಿಯ ಮೇಲಿನರಮನೆ ಆಳಿದ
ಯಾದವರಿಂದ ಯಾದಗಿರಿ ಈ ಊರು

ಬೆಟ್ಟದ ಮೇಲೆ ಸಿಡಿಲು ಬಡಿಯಲು
ಬಂಡೆಯೊಡೆದು ಆಯಿತು ಬಾವಿ
ಬರಗಾಲದಲ್ಲೂ ಬತ್ತದ ಒಣಗದ
ತಣ್ಣನೆ ಕೊರೆಯುವ ನೀರಿನ ಬಾವಿ

ಯಾದಗಿರಿಯನು ಕಲ್ಯಾಣ
ಕರುನಾಡ ಹೃದಯವೆಂದೆನ್ನುವರು
ಇದೇ ಜಿಲ್ಲೆಯ ಸುರಪುರವಾಳಿದ
ವೆಂಕಟಪ್ಪನೆಂಬ ರಾಜರು

ಹೆಮ್ಮೆಯ ನಾಡೊಳು ಕಳಚೂರಿ ಚಾಲುಕ್ಯ
ಪರ್ಶಿಯನ್ನರ ಶಾಸನ ಉಂಟು
ಕೃಷ್ಣಾ ನದಿಯ ಬಸವಸಾಗರ
ಜಲಾಶಯವೂ ಇಲ್ಲುಂಟು

ಕನ್ನಡ ನಾಡಿನ ಎರಡನೆ ದೊಡ್ಡ
ಪಕ್ಷಿ ಧಾಮವು ಬೋನಾಳ
ಸುಂದರ ಶಿಲ್ಪ ಕಲೆಯ ನಾಡಲಿ
ನೋಡಲು ಬನ್ನಿ ಕೋಟೆಗಳ

ದೈವ ಭಕ್ತಿಯಲಿ ವಿಶಿಷ್ಟವಾದ
ಊರೊಂದಿಹುದು ಮೈಲಾಪುರ
ಇಲ್ಲಿನ ಊರಿನ ಅಧಿದೇವತೆಯೆ
ಗುಹೆಯ ಮೈಲಾರ ಲಿಂಗೇಶ್ವರ

ಕೋಳಿ ಸಾಕರು ಮಂಚ ಬಳಸರು
ಕುದುರೆ ಏರರು ಮಡಕೆ ಮಾಡರು
ಗದ್ದುಗೆ ಮೇಲೆ ಮಲ್ಲಯ್ಯ ಕುಳಿತರೆ
ಮಂಚ ಬಳಸಲಾರರು ಈ ಭಕ್ತರೆ

ಶೂರ ವೀರರನು ಶರಣ ಭಕ್ತರನು
ಪಡೆದ ಜಿಲ್ಲೆಯು ಯಾದಗಿರಿ
ಕನ್ನಡ ನಾಡಿನ ಹೆಮ್ಮೆ ಇತಿಹಾಸಕೆ
ಹೆಸರುವಾಸಿ ಈ ಯಾದವಗಿರಿ

ಕರುನಾಡ ಜಿಲ್ಲೆಗಳ ಕಿರು ಪರಿಚಯ – 3 – ಯಾದಗಿರಿ