ನಾನು ಶಾಸಕನಾಗಲು ಅಥವಾ ಸಂಸದನಾಗಲು ಎಂದೂ ಹಪಹಪಿಸಿಲ್ಲ: ನಿಖಿಲ್ ಕುಮಾರಸ್ವಾಮಿ

Spread the love

ಹಾಸನ: ನಾನು ಯಾವಾಗಲೂ ಶಾಸಕನಾಗಲು ಅಥವಾ ಸಂಸದನಾಗಲು ಹಪಹಪಿಸಿಲ್ಲ. ಅದೆಷ್ಟೇ ಆಕಾಂಕ್ಷೆ ಇತ್ತು ಎಂದರೆ ನಾನು ಚಿತ್ರರಂಗವನ್ನು ಬಿಟ್ಟು ನೇರವಾಗಿ ರಾಜಕಾರಣಕ್ಕೆ ಬರುತ್ತಿದ್ದೆ ಎಂದು ಜೆಡಿಎಸ್ ಯುವಘಟಕದ ರಾಜ್ಯಾಧ್ಯಕ್ಷ ನಿಖಿಲ್ ಕುಮಾರಸ್ವಾಮಿ ಹೇಳಿದ್ದಾರೆ.

ಹಾಸನ ಜಿಲ್ಲೆಯ ಅರಕಲಗೂಡಿನಲ್ಲಿ ನಡೆದ ಮಾಜಿ ಸಚಿವ ಎ.ಮಂಜು ಅವರ ಹುಟ್ಟುಹಬ್ಬ ಸಮಾರಂಭ ಮತ್ತು ಕನ್ನಡ ರಾಜ್ಯೋತ್ಸವ ಕಾರ್ಯಕ್ರಮದಲ್ಲಿ ಮಾತನಾಡಿದ ಅವರು, “ಹಾಸನ ಜಿಲ್ಲೆಯ ಜನರು ನಮ್ಮ ಕುಟುಂಬದ ಮೇಲೆ ಪ್ರೀತಿ, ವಿಶ್ವಾಸ ತೋರಿದ್ದಾರೆ. ಸದಾ ರೈತರಿಗೆ ಮನ್ನಣೆ ನೀಡಿದ ಕುಟುಂಬವೆಂಬ ಹೆಗ್ಗಳಿಕೆಯನ್ನು ನಮ್ಮ ಕುಟುಂಬಕ್ಕೆ ಕೊಟ್ಟಿದ್ದಾರೆ. ದೇವೇಗೌಡರು ಸಹಜ ಜನರ ಪಾಲಿನ ನಾಯಕರಾಗಿದ್ದು, ಕೆಂಪುಕೋಟೆ ಮೇಲೆ ಬಾವುಟ ಹಾರಿಸುವ ಇತಿಹಾಸ ಸೃಷ್ಟಿಸಿದ್ದಾರೆ. ಹಾಸನ ಮತ್ತು ರಾಮನಗರ ಜಿಲ್ಲೆಗಳ ಜನತೆ ನಮ್ಮ ಕುಟುಂಬಕ್ಕೆ ನೀಡಿದ ಪ್ರೀತಿ, ಗೌರವವನ್ನು ನಾವು ಎಂದಿಗೂ ಮರೆತು ಹೋಗಲು ಸಾಧ್ಯವಿಲ್ಲ. ನಿಮ್ಮ ಈ ಪ್ರೀತಿ, ನಂಬಿಕೆ ಸದಾಕಾಲ ನಮ್ಮ ಕುಟುಂಬ ಮತ್ತು ಪಕ್ಷವನ್ನು ಮುಂದೂಡುತ್ತದೆ,” ಎಂದರು.

Join WhatsApp Group

ರಾಜಕೀಯ ಮತ್ತು ಚಿತ್ರರಂಗದ ಹಿನ್ನೆಲೆ ಬಗ್ಗೆ ಮಾತನಾಡಿದ ನಿಖಿಲ್ ಕುಮಾರಸ್ವಾಮಿ, “ಚುನಾವಣೆಯ ಗೆಲುವು-ಸೋಲು ಸಾಮಾನ್ಯ. ನಾನು ರಾಜಕೀಯ ಹಿನ್ನೆಲೆಯ ವ್ಯಕ್ತಿಯಾಗಿದ್ದರೂ, ಚಿತ್ರರಂಗದಲ್ಲಿ ನನ್ನದೇ ಆದ ಅಡಿಗಲ್ಲು ಹಾಕಲು ಪ್ರಯತ್ನಿಸಿದ್ದೇನೆ. ನನ್ನ ತಂದೆ ಎಚ್.ಡಿ. ಕುಮಾರಸ್ವಾಮಿ ಜಾಗ್ವಾರ್ ಮೂಲಕ ನನ್ನನ್ನು ಚಿತ್ರರಂಗಕ್ಕೆ ಪರಿಚಯಿಸಿದರು. ನಂತರ ನಾನು ಸಾಕಷ್ಟು ಚಿತ್ರಗಳಲ್ಲಿ ನಟಿಸಿದೆ. ಆದಾಗ್ಯೂ, ಜನಸೇವೆ ಎನ್ನುವುದು ನನ್ನ ಮೊದಲ ಆದ್ಯತೆಯಾಗಿದ್ದು, ಅದಕ್ಕೆ ಅರ್ಪಣೆಯಾಗಿದ್ದೇನೆ,” ಎಂದು ತಿಳಿಸಿದರು.

92 ವರ್ಷ ವಯಸ್ಸಾದರೂ ದೇವೇಗೌಡರು ರಾಜ್ಯಸಭೆಯಲ್ಲಿ ನಿಲುವು ಹಿಡಿದು, ನೆಲ-ಜಲ-ಭಾಷೆ ಉಳಿಸಲು ಹೋರಾಟ ನಡೆಸುತ್ತಿದ್ದಾರೆ. “ಅವರು ನನ್ನ ಜೀವನದ ಸ್ಪೂರ್ತಿ. ಪಕ್ಷವನ್ನು ಸಬಲಗೊಳಿಸುವ ಜವಾಬ್ದಾರಿ ನನಗೆ ಇದೆ. ಪಕ್ಷವು ಸಂಕಷ್ಟದಲ್ಲಿದ್ದಾಗ, ಪಕ್ಷದ ಕಾರ್ಯಕರ್ತನಾಗಿ ಶ್ರಮಿಸಿದ ಅನುಭವ ನನಗಿದೆ,” ಎಂದ ಅವರು, “ಈ ಉಪಚುನಾವಣೆಯಲ್ಲಿ ಸೋಲಿದ್ದರೂ, ನಾನು ಹೋರಾಟವನ್ನಿಲ್ಲಿಯೇ ನಿಲ್ಲಿಸುವ ಪ್ರಶ್ನೆಯೇ ಇಲ್ಲ. ಜನತಾದಳ ಪಕ್ಷವನ್ನು ಹಿಂದುಳಿಯದಂತೆ, ಪ್ರಾದೇಶಿಕ ಪಕ್ಷವಾಗಿ ಬೆಳೆಸಲು ಹೋರಾಡುತ್ತೇನೆ. ಕನ್ನಡಿಗರ ಅಸ್ಮಿತೆ ಉಳಿಯಲು ಈ ಪಕ್ಷ ಅಗತ್ಯವಿದೆ,” ಎಂದು ಹೇಳಿದರು.ಇದನ್ನು ಓದಿ –ಎರಡಕ್ಕಿಂತ ಹೆಚ್ಚು ಮಕ್ಕಳಿದ್ದರೆ ಸರ್ಕಾರಿ ಉದ್ಯೋಗಕ್ಕೆ ಅರ್ಹತೆ ಇಲ್ಲ: ಸುಪ್ರೀಂ ಕೋರ್ಟ್ ಮಹತ್ವದ ತೀರ್ಪು

“ನಾನು 36 ವರ್ಷದ ಯುವಕ. ನನ್ನ ಮುಂದೆ ಇರುವ ದೊಡ್ಡ ಸವಾಲು ಪಕ್ಷವನ್ನು ದಡ ಮುಟ್ಟಿಸುವುದು. ಶಾಸಕರಾಗುವ ಅಥವಾ ಸಂಸದನಾಗುವ ಕನಸು ನನಗಿಲ್ಲ. ಜನತಾದಳ ಪಕ್ಷದ ಭವಿಷ್ಯವೇ ನನ್ನ ಕಾಳಜಿಯ ವಿಷಯ,” ಎಂದು ನಿಖಿಲ್ ಕುಮಾರಸ್ವಾಮಿ ಭರವಸೆ ನೀಡಿದರು.